Соңғы жылдары аудан өңірдің негізгі даму нүктелерінің біріне айналды. Мұнда заманауи мектептер мен тұрғын үйлер белсенді түрде салынып, инженерлік желілер жаңғыртылып, ауылдық медицина дамытылып, ауқымды инфрақұрылымдық және инвестициялық жобалар жүзеге асырылуда, жаңа өндіріс орындары ашылуда. Өңірлік коммуникациялар қызметі алаңында өткен брифинг барысында Целиноград ауданының әкімі Дарын Сабырғали қол жеткізілген нәтижелер, іске асырылып жатқан жобалар және алдағы кезеңге арналған басым міндеттер туралы баяндады.
Ауданның басты жетістіктерінің бірі – мектептердегі орын тапшылығы мәселесінің іс жүзінде толық шешілуі болды. «Келешек мектептері» ұлттық жобасы аясында Талапкер, Қоянды, Қараөткел, Қаражар, Ақмол және Қабанбай батыр ауылдарында заманауи білім беру мекемелері пайдалануға берілді. Жаңажол ауылында ашылған жаңа мектепті қоса есептегенде, аудан бойынша оқушы орындарының тапшылығы сегіз есеге қысқарды. Сонымен қатар ауылдық медицина саласында да айтарлықтай ілгерілеу байқалады – елді мекендерде алғашқы медициналық-санитарлық көмек көрсететін 16 жаңа нысан жұмысын бастады. Олардың қатарында дәрігерлік амбулаториялар, медициналық және фельдшерлік-акушерлік пункттер бар.
«Біздің басты міндетіміз – ауыл тұрғындарын қай жерде тұрса да сапалы қызметпен қамтамасыз ету. Сондықтан әлеуметтік инфрақұрылымды дамытуға деген көзқарасты түбегейлі өзгертіп, оны әрбір азамат үшін қолжетімді етуге күш салып жатырмыз. Заманауи мектептер салу мен жаңа медициналық пункттер ашу – ауылдағы өмір сапасын арттыруға бағытталған ауқымды жұмыстың алғашқы кезеңі ғана», – деп атап өтті Дарын Сабырғали.
Аудан экономикасының берік негізі агроөнеркәсіптік кешен мен өнеркәсіп саласындағы жоғары көрсеткіштермен нығаюда. Өткен жылы жергілікті шаруашылықтар шамамен 30 мың тонна ет және 61 мың тоннадан астам сүт өндіріп, мал мен құс басын көбейтуді, егіс алқаптарын кеңейтуді және өнімді қайта өңдеуді дамытуды жалғастырды. Сонымен қатар жергілікті тұрғындарды жұмыспен қамтитын жаңа өндірістік нысандар ашылуда. Атап айтқанда, Арайлы ауылында жаңа аяқ киім фабрикасы іске қосылса, Қызылсуат ауылында желдету жүйелерін шығаратын өндіріс пен заманауи қойма кешені пайдалануға берілді.
Тұрғын үй-коммуналдық шаруашылық саласында да ауқымды жұмыстар атқарылды. Аққайың, Нұресіл, Қараменді батыр, Родина және Тоңкеріс ауылдарында жаңа су құбыры желілері салынды. Ал Қараөткел, Қызылсуат және Софиевка ауылдарында сумен жабдықтау нысандарын салу мен жаңғырту жұмыстары жалғасуда. Биылғы жыл ауданның газдандыру тарихында да маңызды кезең болды. Нұрлы, Аққайың, Шұбар, Алтынсарин, Талапкер, Қоянды және Қараөткел ауылдары табиғи газға қосылды. Қазіргі уақытта келесі кезеңде газдандырылатын ауылдарға арналған жобалар әзірленуде.
Халық үшін ең өзекті бағыттардың бірі – жол инфрақұрылымы. Өткен жылы ауданда 80 шақырымнан астам жолға асфальт төселіп, Қараөткел, Қоянды, Қажымұқан, Аққайың, Қабанбай батыр, Қызылжар, Арайлы және Родина ауылдарының көшелері жаңартылды.
«Аудандағы жол желісін дамыту жұмыстары міндетті түрде жалғасады, өйткені сапалы көлік инфрақұрылымы экономикалық белсенділікке тікелей әсер етеді. Биыл жергілікті маңызы бар тағы 75 шақырымнан астам жолды асфальттауды жоспарлап отырмыз. Тұрғындар тарапынан жиі көтерілетін ауылішілік жолдардың ең проблемалы учаскелерін толық шешуді көздеп отырмыз», – деді аудан әкімі.
Сонымен қатар ауданда тұрғын үй мәселесі кезең-кезеңімен шешіліп, абаттандыру жұмыстары қарқынды жүргізілуде. Ақмол ауылында жаңа көпқабатты тұрғын үйдің құрылысы аяқталды, тағы он көпқабатты үй салыну үстінде. Жаңа тұрғын үйлермен қатар жайлы өмір сүру ортасы да қалыптасуда: 15 ауылда заманауи балалар және спорт алаңдары орнатылды. Тұрғындардың қауіпсіздігін арттыру мақсатында көшелерге бейнебақылау жүйелері қойылып, 12 елді мекенде 5 мыңнан астам энергия үнемдейтін шам орнатылды.
Жаңартылған инфрақұрылымды тиімді басқару үшін өңірге жас мамандар белсенді тартылуда. «Дипломмен ауылға!» мемлекеттік бағдарламасы аясында ондаған жас маман жеке баспана сатып алу мүмкіндігіне ие болса, ауылдық жерлерге жұмысқа келген екі жүзден астам қызметкерге көтерме жәрдемақы төленді. Алдағы жылдары Целиноград ауданының басшылығы жаңа индустриялық аймақтар құруға, инвестиция тартуға және туризмді дамытуға басымдық бермек.
«Бүгінде ауданда кезең-кезеңімен жүзеге асырылып жатқан барлық жобалар азаматтар үшін қолайлы орта қалыптастыруға және аумақтардың тұрақты дамуын қамтамасыз етуге бағытталған. Біз тек нысандар салып жатқан жоқпыз, болашақ ұрпақ үшін берік экономикалық және әлеуметтік негіз қалыптастырып жатырмыз. Біздің ұзақ мерзімді мақсатымыз – Целиноград ауданын өмір сүру сапасы жоғары, индустриялық және аграрлық секторлары дамыған алдыңғы қатарлы өңірге айналдыру», – деп түйіндеді Дарын Сабырғали.