Конституция – кез келген мемлекеттің қоғамдық құрылымының негіздерін, мемлекеттік басқару жүйесін, азаматтардың құқықтары мен бостандықтарын, сондай-ақ елдің стратегиялық даму бағыттарын айқындайтын басты заң. Сондықтан Қазақстанның жаңа Конституциясының күшіне енуі қоғамдық өмірдің барлық саласы үшін, әсіресе мемлекеттің зияткерлік әлеуеті мен болашағын қалыптастыратын білім беру жүйесі үшін ерекше маңызға ие.
Қазақстан Республикасының Президенті еліміздің қоғам өмірінің барлық саласын қамтитын ауқымды жаңғыру жолына түскенін атап өтті. Бұл мемлекеттік институттарды жетілдірумен қатар, жауапкершілікке, заңға құрметке, әділдікке және азаматтық белсенділікке негізделген жаңа қоғамдық мәдениетті қалыптастыруды білдіреді.
Жастар арасында жоғары құқықтық мәдениетті қалыптастырудың маңызы арта түсуде. Конституцияны білу, өз құқықтары мен міндеттерін терең түсіну, заңдылық пен әділдік қағидаттарын құрметтеу – қуатты азаматтық қоғам құрудың берік негізі.
Жаңа Конституция – Қазақстанның одан әрі дамуының стратегиялық бағдары. Ол мемлекеттің құқықтық негіздерін нығайтып, заманауи білім беру жүйесін дамытуға, белсенді әрі жауапты азаматтарды тәрбиелеуге, адами капиталдың сапасын арттыруға және білімге, әділдікке әрі заң үстемдігіне негізделген қоғам қалыптастыруға кең мүмкіндік береді.
Халықаралық «Қазақ тілі» қоғамы қоғамдық бірлестігінің Ақкөл ауданы бойынша филиалы төрайымы
Ахтышхан Ханша